Самуил Маршак нима челядь библиотекаын нимӧдісны Полякова Эльвира Ивановналысь «Кӧні дзебсясьӧ йӧлӧга?» небӧг, челядьлы лыддьӧм вылӧ выль петас. Медшӧр мӧвпыс – тӧдмӧдны быдмысь войтырӧс асгӧгӧрса олӧмнас, велӧдны бурӧн-ладӧн овны вӧр-ваыскӧд, ӧта-мӧдныскӧд, верстьӧ йӧзкӧд. Та дырйи кужны петкӧдлыны асьсӧ водзмӧстчысь мортӧн, быдтор тӧдны кӧсйысьӧн, олӧма йӧзӧс, налысь олан ладсӧ, киподтуйсӧ пыдди пуктысьӧн. Небӧгыс зэв мусаник: ыдждаыс лӧсялӧ, мича серпасъяса, авторкӧд тшӧтш уджалӧма Клейман Валентин Александрович, зэв киподтуя художник. 
Библиотека бура дасьтысьӧма небӧгсӧ нимӧдны. Сэні уджалысь Третьякова О.П. котыртӧма небӧг авторыскӧд аддзысьлӧм, лӧсьӧдӧма викторина, сёрнитчӧма велӧдысьяскӧд, медым дасьтыны челядьӧс петкӧдлыны висьтъяс сертиыс сценкаяс. 
Видзӧдысьяс – карса школаясысь да коми гимназияысь челядь – сюся кывзісны авторӧс, сэсся тыр синмӧн видзӧдісны аскӧддьӧм артистъяслысь петкӧдчӧмъяссӧ: «Буско», «Бур кывйыд ставыслы лӧсялӧ», «Лапкор» висьтъяс вылӧ лӧсьӧдӧм сценкаяс. Артисталісны карса 18-ӧд да 12-ӧд шӧр школаясын велӧдчысь челядь. Сёрнитісны ставӧн комиӧн, комиӧн жӧ зілисны вочавидзны юалӧмъяс вылӧ. 
Небӧг нимӧдысьяс пӧся аттьӧалісны авторӧс, том артистъясӧс, ставӧн чӧсмасисны кампет-преникӧн, снимайтчисны. Небӧг гаж удайтчис.

Фото с мероприятия