Вӧльгым 2 лунӧ Москваын Федерация Сӧветын кыпыда воссис велӧдчысьяслӧн да студентъяслӧн канму кывъяс серти тӧдӧмлун петкӧдлан Ставроссияса олимпиада. Котыртісны сійӧс Россия Федерацияса образование да наука министерство, Казаньса федеральнӧй университет да Москваса А. С. Пушкин нима роч кыв велӧдан канму институт. Татчӧ воисны Россияса 21 регионысь 17 ас, национальнӧй,  кывйӧн  сёрнитысь челядь. На пӧвстын вӧліны и Коми муысь воӧм челядь.

Ставроссияса олимпиадаӧ пырӧдчысьыс вӧлі 6110 морт. На пӧвстын фин-йӧгра регионъясысь вӧлӧма  451 морт.  Олимпиада котыртысьяс юкисны сійӧс  кык тшупӧд вылӧ. Медводз челядь вермасисны асланыс регионъясын,  а сэсся медбур  тӧдӧмлун петкӧдлысьяссӧ корисны Москваӧ. Коми муысь усис шуд сэтчӧ ветлыны 10 класса велӧдчысьяслы: Помӧсдін сиктса школаысь Шомысова Ольгалы, Ухтаса гуманитарно-педагогическӧй лицейысь  Мещанникова Анастасиялы, Петруньысь Терентьев Иванлы.   11 класса велӧдчысьяслы: юркарса  искусство гимназияысь  Калинина Светланалы, Важгортса школаысь Гилева Анастасиялы, Ыджыдвиддзысь  Селькова Фаиналы; госслужба академияын медводдза курсын велӧдчысь Сенькина Дианалы, С. М. Киров нима лесотехническӧй университетса медводдза курсын велӧдчысь Матвеева Екатериналы, госслужба академияын мӧд курсын  велӧдчысь Кривых Кристина да Изъюров Альбертлы. Менӧ  пуктісны колльӧдысьӧн. Став лунсӧ Москваын ме вӧлі накӧд.

Канкарын овмӧдісны миянӧс комын куим судтаа «Аструс» гостиницаӧ, кык морта жыръясӧ. Ставлы воис сьӧлӧм вылӧ оланіныс. Асывнас вердісны ресторанын, луннас да рытнас сёйим Пушкин нима институтас.

Кор миянлы висьталісны, мый олимпиадаын вермысьясӧс кӧсйӧны чолӧмавны Федерация Сӧветын, дерт, быдӧнлӧн ылькмунліс сьӧлӧмыс. Ӧд сэні уджалӧны канмуса медыджыд веськӧдлысьяс! Вичмылас-ӧ коркӧ нӧшта веськавлыны татчӧ?!

Олимпиадасӧ восьтісны зэв торжественнӧя да шоныда. Локтысьясӧс видео пыр чолӧмалісны Россияса образование да наука министр Ольга Васильева, Федерация Сӧветса председатель Валентина  Матвиенко, Пушкин нима институтса проректор Михаил Осадчий, Казаньысь филология да межкультурнӧй коммуникация институтса директор Радиф Замалетдинов. Президиумын пукалісны и мукӧд ыджыд чина йӧз.

Аттьӧалан кывъясӧн веськӧдлысьяс дорӧ шыӧдчисны тшӧтш велӧдчысьяс, студентъяс, велӧдысьяс, бать-мам. Верстьӧяс унаысь тӧдчӧдісны, мый миян странаын тайӧ зэв тӧдчана (уникальнӧй) мероприятие, ӧд сылӧн могыс ‒ видзны да сӧвмӧдны войтыръяслысь чужан кыв, петкӧдлыны роч кыв бура тӧдӧм, ёнмӧдны национальнӧй культураяс, ӧта-мӧд костын ёртасьӧм.

Олимпиада вылӧ локтысьяс пукалісны сенаторъяслӧн джуджыд креслӧясын. Вӧлись быттьӧ  пыдісяньджык кутіс  вежӧртсьыны,  кытчӧ  веськалісны, мый насянь виччысьӧны. Чолӧмалӧм бӧрын сетісны кад сэні снимайтчыны. Коді сувтіс трибуна сайӧ, коді  аслас флаг дорӧ, коді герб улӧ…

Вӧльгым 3-ӧд лунӧ муніс олимпиадаыс.  Медводз час да джынйӧн  челядь гижисны эссе,  куим темаысь колӧ вӧлі бӧрйыны ӧтиӧс. А сэсся петкӧдлісны гортса удж: чужан кывйӧн мичаа лыддисны кывбур, роч вылӧ вуджӧдӧмсӧ, а сэсся вит минутӧн висьталісны асланыс республика йылысь. Унаӧн ассьыныс сёрнисӧ гажӧдісны мича презентацияясӧн, видеосюжетъясӧн, сьылӧмӧн-йӧктӧмӧн. Велӧдысьясӧс эз лэдзны видзӧдны ордйысьӧмъяссӧ, вит торъя жырйын вӧліны сӧмын жюри. Быдӧнӧс донъялісны, збыльысь, зэв стрӧга.

Олимпиада уджъяс вӧчӧм бӧрын миянлы котыртісны Москваті экскурсия, а рытнас ми асьным, гуляйтігмоз, ветлім Гӧрд площадь вылӧ. Кодсюрӧыс канкарӧ воӧмаӧсь медводдзаысь, медводдзаысь мунісны метроӧн. Ми уна снимайтчим, радлім, мый медсьӧкыдыс колис бӧрӧ.

Аскинас жюри юксисны мӧвпъяснас, артмӧма-ӧ челядьлӧн  эссесыс, мый колӧ бурмӧдны. Шуисны, мый гижӧмаӧсь грамотнӧя, зэв этша вӧчӧмаӧсь орфография да пунктуация ӧшыбкаяс. Нелючкияс аддзӧмаӧсь стильсьыс. Кодкӧ лӧсьӧдӧма выль кыв: лексикограф пыдди гижӧма лингвистограф. Тешкодьторъяс вылас ставӧн сералыштім. Сэсся быд участниклы торйӧн петкӧдлісны уджсӧ, гӧгӧрвоӧдісны, мыйла тадзи донъялісны.

Бӧрсӧ мунны ковмис водзджык ‒ поездыс сідзи ветлӧ, но век жö зэв нимкодь сыысь, мый миян вит призёр: тайӧ Шомысова Ольга, Гилева Анастасия, Селькова Фаина, Кривых Кристина, Матвеева Екатерина.  Вомгора петкӧдчӧмын ёртъяс пӧвстас медыджыд баллыс Калиниа Светланалӧн. Ветымынысь сылӧн чукӧрмӧма нелямын витыс.

Сідзкӧ, эгӧ прӧста ветлӧй. Тайӧ олимпиадаыс ышӧдіс быдӧнӧс бура велӧдны да тӧдны чужан кыв, ассьыным культуранымӧс, пыдди пуктыны мукӧд войтыръясӧс.

Ыджыд аттьӧ ставӧн висьталам Коми муын олимпиада котыртысьяслы, туйысь сьӧм вештысьяслы: национальнӧй политика министерстволы, образование, наука да том йӧз политика министерстволы, тӧдӧмлун сӧвмӧдан институтлы. Сэні уджалысьяс  вӧчисны ставсӧ  ас кадӧ, медым Комиысь  челядь вермисны петкӧдчыны Москваын. Эскам, мый и водзӧ лоӧ тадзи.

Лидия Зварич,

Коми Республикаса Юралысь бердын

искусство гимназияса коми кыв да литература велӧдысь